“Ar yr hyn bethau y mae’r angylion yn chwenychu edrych.”
1 Pedr 1:12 (Bod Alwyn M.B.)
Pêr ydyw enw Duw,
Mwyn ydyw geiriau gras,
Bendith yw gwybod am Ei friw
Ar fynydd tyner glas.
Swynol yw cân y nef,
Llawen yw cerdd y côr,
Rhyfedd ddatguddiad ynddo Ef,
Uniganedig Iôr.
Gwyrthiol Ei eni gwiw,
Perffaith Ei fywyd gwyn,
Sanctaidd Ei aberth glân a’i friw,
Rhyfedd eiriolaeth syn.
Wele angylion Iôr
Draw mewn rhyfeddol nef,
Gweld Ei ddoethineb, sanctiadd stôr
Yn Ei efengyl Ef.
Pwy fel Efe i ni?
Gobaith pechadur pell,
Gwelodd ein pellter, clywais gri
Am etifeddiaeth well.
Brysiodd Ei ras yn rhydd,
Rhedodd Ei gariad cu,
Cododd trugaredd f’enaid prudd,
Cuddiodd tangnefedd fi.


